SC in Tripura-ah NRC update turin ti

Supreme Court chuan Thawhṭanni khan thuchhuah siamin sor-kar laipui leh Election Commission hnenah Tripura-a National Register of Citizens (NRC) update kalpui turin a ti.

Thupek hi Chief Justice Ranjan Gogoi, Justices S K Kaul leh M Joseph-te tihchhuah niin Court chuan Tripura-a dan loa lut te enfiahna turin EC leh sorkar laipui chu a hriattir.

Tripura People’s Front chuan SC hnenah hian petition thehlut in an state chhunga dan loa awm te hriatchhuah an nih theih nan leh hnawhchhuah an nih theihna turin NRC update kalpui turin an ngen a, court chuan hemi chungchang hi ngaihtuahin thutlukna hi Thawhṭanni khan an puangzar ta a ni.

Petition thehluhah hian India Cosntitution Articles 14, 15, 19, 21, leh 29-te chu kenkawh an ngiat a, an state chhungah chuan kum 50 chhung vel chu Bangladesh mi dan loa inbengbel an tam thu ziak langin an state dinhmun pawh a inthlak phah vek niin an ziak bawk.

Petition thehluhah hian Tripura tribal state ni ṭhin chu tribal state pawh an nih tawh loh thu ziahlan a ni bawk a ni.

Sorkar laipui hian SC kaihhruaina hnuaiah kumin July 30 khan Assam-a NRC draft list an tichhuak a, hetah hian mi nuai 40 chuang an tel lo a ni. Mi vaibelchhe 3.29 apply awm zingah vaibelchhe 2.89 chu list-ah hian tel thung.