Manipur People’s Protection Bill in state chhunga inbenbel khap dawn lo: CM

Manipur Chief Minister N Biren Singh chuan Manipur People’s Protection Bill chuan state chhunga inbenbel a khap dawn lo tih sawiin National Register of Citizens (NRC) nen a inang lo tih a sawi.

Manipur assembly in July 23-a an bill pawm Manipur People’s Protection Bill hian Meitei, Pangal Muslim, scheduled tribe leh 1951 hmaa Manipur-a awm tawh te leilung fa (natives) nihna dinhmun pek a tum ber a ni.

Bill hnuaiah hian a chunga tarlan tak loh te hi chu 'Non-Manipuri' anga chhiar an ni dawn thung a, thla khat chhungin an in register a ngai dawn a ni.

Inrinnia India Today Conclave East-a thu a sawinaah Chief Minister N. Biren Singh chuan NRC chuan Manipur-ah awmzia a nei ve lo tih sawiin NRC chu Assam tan chauh a nih thu a sawi. People’s Protection bill chuan tuman an state chhunga inbenbel a khap dawn lo a ni, a ti.

Biren Singh chuan NRC leh People’s Protection bill inanna awmchhun chu an khua leh tuite hriatfiahna tura tih a ni ve ve a ni, a ti bawk. People’s Protection bill chuan bungraw lei leh inbenbel a khap ve dawn lo thung niin a sawi a ni.

CM Singh chuan Manipur leh Kashmir dinhmun chu a inang lo tih sawiin Armed Forces (Special Powers) Act chu municipal area-ah chuan sut vek a ni tawh tih a sawi a, hetihlai hian thingtlang lamah chuan India ram inpumkhatna chu ngaihpawimawh a nih avangin hun rei lote chhung chu AFSPA chu hman a la ngai niin a sawi.

CM chuan thingtlang lamah pawh hian boruak a ralmuang sawt hle tih a sawi a, Kashmir-ah chuan Pakistan aṭanga lo lut an buaipui a ngaih laiin Manipur-ah chuan buaina chu state chhung aṭanga veka chhuak a nih avangin a buaithlak bik hle tih a sawi bawk a ni.