Nagaland : Innovation hub & space education centre hmasa ber hawng

Nagaland Chief Minister Neiphiu Rio chuan an state chhunga innovation hub and space education centre hmasa ber Dimapur-a Nagaland Science Centre-ah Pathianni khan a hawng.

Innovation hub and space education centre din a nih chhan ber chu Nagaland zir­laite science leh technology kal­tlanga socio-cultural leh economic hmasawnna thlen a nih theihna tur a ni.

National Council of Science Museums, Kolkata leh Centre’s department of science and technology ṭangkawp in an sak niin chhawng hniha sangin an sa. Mhonlumo Kikon, Science and Technology Department Advisor chuan hetiang thil hi state chhunga a din vawikhatna a nih thu a sawi a, an centre din thar chu ṭhalai ten an ngaihtuahna leh an ruahmanna neih te an sawichhuah a an pholan theihna tur anih thu a sawi.

Kikon chuan ṭhalaite rilrua science leh hmasawnna dang tuh a nih theihna turin ‘Chief Minister’s Innovation Award’ siam a rawt bawk a ni.

Chief Minister Rio chuan natna leh harsatna tam tak chu science leh technology hmanga chinfel theih a nih thu a sawi a, space education center leh innovation hub din chuan zirlaite rilruah thil sang zawk duhthusamna rilru a siamsak thei dawn tih a sawi.