Meghalaya minister hlui thi

Meghalaya Power Minister hlui leh Congress legislator hlun tak Clement Marak chu Thawhṭanni khan New Delhi-a private damdawi-inah a thi.

Clement Marak hi cancer vanga hun eng emaw chen enkawl a ni tawh a, US-ah te pawh treatment a la tawh nghe nghe a, Thawhṭanni khan kum 58 mi niin a thi ta a ni.

Marak ruang hi nimin khan Shillong panpui a ni tawh a, an khua Garo Hills lam panpui leh a ni ang.

Sorkar hmasa Congress kaihhruai Meghalaya United Alliance government-ah khan Marak hi Power Minister niin kumin February inthlanah pawh khan damlo chung chung in a in contest leh a, Selsella constituency-ah dingin National People’s Party nominee, Ferlin C.A. Sangma a hneh leh tho a ni.

Congress thupuangtu Zenith Sangma chuan Max Super-specialty Hospital, Shalimar Bagh-ah Marak hi a boral thu a sawi.

Chief Minister Conrad Sangma chuan Clement Marak thih thu chuan a ṭhawng tak zet tih sawiin inthlanah te seat inchuhin inel fo ṭhin mah se inhuatna an nei ngai lo tih a sawi a, a unaupa upa zawk ang mai a nih thu a sawi. Rei tak natna in tlakbuak mah se mipuiteah a tla na reng a, a hmunruak chu hnawhkhah theih a ni dawn lo tih a sawi a ni.