AP-ah vur tawlhin sipai 7 chhilh hlum

Arunachal Pradesh-a Kameng sector-a Pathiannia vur nasa taka a tawlh hnua chin hriat loha awm, sipai pasarihte chu vur tawlh hian a chhilh hlum vek tih Thawhlehni khan Indian Army chuan a sawi.

February 6 khan Tawang district-a Kameng sector-ah vur nasa takin a tawlh a, he thil thlen hnu hian patrol team-a sipai pasarihte chu an chin hriat lohin an awm zui a ni. He vanduaina thlenna hnu hi feet 14,500 vela sang niin, tun hnaiah vur a sur nasa hle.

Army official-te chuan Jang police station-ah thil awmdan an thlen nghal a, mahse vur tawlhna hmun hi kilkhawr tak a nih avang leh, vur surin kawngpui a hnawh avangin duh angin hma an la nghal mai thei lo a ni. Chhanchhuah hna thawk tur hian specialised team chu thlawhtheihna hmangin an kal a, sipai pasarihte hi an zawn hnuah vur tawlhin a chhilh, an ruangte chu an hmu ta a ni.

President Ram Nath Kovind chuan sipaite chunga vanduaina rapthlak tak thleng chu pawi a ti takzet tih sawiin, "Ram tan an nunna an hlan ta a ni. An inpekna hi hriatreng a ni ang," tiin sipai chhungte a tawrhpui thu a sawi.

Prime minister Narendra Modi pawhin a twitter-ah pawi a tih thu sawiin, ram tana an hnathawhte engtikah mah theihnghilh a ni lo ang, a ti.

Army chief Genenal MM Naravane leh sipai officer hrang hrangte pawhin sipai thi chhungte an tawrhpui thu an sawi bawk.

Arunachal Pradesh governor BD Mishra leh chief minister Pema Khandu-te pawhin Tawang-a an duty-naa nunna chan, sipai pasarih thite an ui thu leh, an chhungte an tawrhpui thu an sawi. Arunachal Chief Minister Office chuan sipai thi chhungte hnenah, Chief Minister's Relief Fund (CMRf) aṭangin ralna, cheng nuai li ṭheuh pek an ni dawn tih a sawi.

Governor Mishra chuan khawvawt tak hnuai leh hmun chhengchhe taka sipaite'n ram venhim hna an thawh leh, an inpekna chu Arunachal Pradesh mipuite chauh ni lo, India ram mipuiten an hre reng dawn a ni, a ti.