Nagaland-a eptu awm lohna UDA sorkara chairman-ah TR Zeliang ruat

Nagaland-a eptu awm lohna United Democratic Alliance (UDA) sorkarah Naga People's Front (NPF) Legislature party leader TR Zeliang chu chairman atan ruat a ni.

UDA sorkara tel - NDPP, BJP, NPF leh independent MLA-ten joint parliamentary meeting an neihah TR Zeliang hi chairman atana ruat an rel tih minister of planning & coordination, land revenue and parliamentary affairs Neiba Kronu chuan a sawi. Hei bakah hian NPF MLA pakhat chu minister-a dah an rel bawk a, Raj Bhavan-ah lakluh a ni dawn tih BJP thupuangtu Mmhonlumo Kikon chuan a sawi bawk.

Kum 2020 October thla khan minister of environment, forest and climate change CM Chang a thi a, hei vang hian minister post pakhat hi hnawhkhah lohin a la awm a ni.

Nagaland-a political party hrang hrangte chuan Naga buaina chinfel a nih thuai theihna tura chak zawka hma an lak theihna turin, nikum khan eptu party awm lohna sorkar siam an remti a, UDA sorkarah an tel vek a ni.