Tripura BJP MLA hlui 2-in Congress party zawm

Tripura-a rorellai, BJP MLA pahnih Sudip Roy Barman leh Asish Kumar Saha-te chuan MLA an nihna leh, BJP member an nihna aṭanga banna an thehluh hnuah Congress party an zawm ta.

Barman leh Saha-te hian Tripura-a BJP sorkarna hnuaiah democracy chu dinhmun derthawng takah a ding mek nia sawiin, he party hmang hian mipuite rawng an bawl chhunzawm theih loh avangin an chhuahsan tih an lo sawi tawh a ni.

Thawhaṭannia BJP aṭanga banna an thehluh hnuah, MLA hlui pahnihte hian New Delhi pan nghalin Congress hruaitu, Rahul Gandhi leh Priyanka Gandhi Vadra te an hmu a, hemi hnu Thawhlehni khan Congress party-ah an lut ta a ni.

Congress party-a lakluh a nih hnua thu a sawiah, Barman chuan MLA dang ban duh pawh eng emaw zat an la awm a, an la nghak rih mai mai niin a sawi. BJP-ah tumah an lungawi tawh lo a, hei vang hian Gujarat leh Himachal Pradesh-te rualin inthlan an neih ve mai a ngaih a rin thu a sawi.

Barman chuan BJP sorkarna hnuaiah mipuite leh media mite hrekbeh leh rahbeh an ni a, hei vang hian an state-a democracy tungding leh turin hma an lak a ngai tih a sawi. BJP chu 2018 Assembly inthlan dawna a thutiamte chu engmah tihhlawhtling lohah a puh bawk.