Assam-in politician leh VIP-te vengtu PSO 700 chuang ko let

Assam sorkar chuan politician leh VIP-te vengtu, Personal Security Officer (PSO) atan a dah zinga 700 chuang chu a ko let tawh tih chief minister Himanta Biswa Sarma chuan a sawi.

Chief Minister chuan Security Advisory Committee thurawn angin, politician leh mi pawimawh dang tam tak chuan an dinhmun leh an himna te an ennawn hnuah PSO pek tihtawp hnial buaina engmah an nei lo a ni, a ti.

PSO dang 2,000 pawh titawp la tum a nih thu sawiin, heng hmang hian battalion thar pahnih an siam thei dawn tih CM chuan a sawi bawk.

Kumin January 1-a cabinet meeting neihah khan, CM Sarma chuan state chhunga PSO dah dan chungchang policy thar siam a nih tur thu sawiin, security advisor committee-in constitutional post-a awmte bakah, venhimna pek ngai zualte tih loh chu PSO pek an nih chungchang a ennawn dawn tih a lo sawi tawh a ni.

State sorkarin PSO dah chungchanga policy thar a kalpui hma hian, Assam Police-a battalion pali, mi 4,240 zet chu PSO atan dah niin, heng zinga a zahve zet chu politician-te veng tura dah an ni.