Meghalaya Congress MLA 5-ten MDA sorkar zawm

Meghalaya-a eptu party, Congress party MLA pangate chuan an vaiin BJP thlawp, Meghalaya Democratic Alliance (MDA) sorkar an zawm. State assembly-a eptu lamah Trinamool Congress chauh an awm dawn ta a ni.

Meghalaya Pradesh Congress Committee (MPCC) president Vincent H Pala hian an party MLA-te hian an pawmpui engmah awm loin MDA sorkar hi an zawm tih sawiin, MLA-te chetdan chuan a ṭhawng hle tih a sawi. Vawiin hian an chungchang ngaihtuahin executive committee an nei dawn tih a sawi nghal bawk.

Party general secretary Deborah C Marak pawhin MLA-te thiltih dan chu sawiselin, "Hetiang thil lian thamah MPCC emaw, Delhi lama party high command-te emaw berawn hmasa miah loha thutlukna an siam hi a mak hle a ni. Party pawhin inkaihhruaina kan nei vek a ni," a ti.

Assembly inthlan hnuhnungah khan Congress party hian MLA 17 a nei a, mahse heng zinga 12-te chuan nikum November thla khan Trinamool Congress (TMC) an zawm a, an zingah hian chief minister hlui Mukul Sangma pawh a tel. Mahse Congress MLA bang la awm panga - Ampareen Lyngdoh, Mohendro Rapsang, PT Sawkmie, Mayralborn Syiem leh Kimfa Marbaniang-te chuan MDA sorkar an zawm ve leh ta a ni.

Hetih lai hian Congress Legislature Party (CLP) leader Ampareen Lyngdoh chuan MDA sorkar zawm mah se, Congress party-ah an la awm chhunzawm zel dawn tih a sawi. Thawhlehnia chief minister Conrad Sangma hnenah MDA an zawm thu ziaka an hriattirnaah, sorkar tha tichak tur leh, state-in chak zawka hma a sawn theihna tur te, state mipuite tana ṭha nia an hriat avangin MDA chu an zawm tih an sawi. "MDA kan zawm a, mahse Congress-ah kan la awm chhunzawm zel dawn tho a ni," an ti.

National People's Party (NPP) kaihhruai MDA sorkar hi United Democratic Party, People's Democratic Front, Hill State People's Democratic Party, Bharatiya Janata Party, Nationalist Congress Party, Khun Hynniewtrep National Awakening Movement leh Independent MLA-ten an thlawp a ni.

Chief Minister Sangma chuan MDA sorkar zawmtu, Congress party MLA pangate hi cabinet-a dah tumna emaw, cabinet siksawi phah tumna emaw a awm lo tih a sawi a, mahse an mawhphurhna tur ang chu sorkarin a la ngaihtuah dawn a ni, a ti. MDA-a Congress MLA-te an tel ve tak avangin NPP leh a thawhpui dang party-te inkar boruak pawh a danglam phah dawn lo tih a sawi bawk.