Manipur assembly : Candidate 176 nomination paper thehluh pawm

Manipur assembly inthlan thawh khatna, February 27-a neih tura chuh tumte tan nomination paper thehluhte enfiah a nih hnuah, candidate 176-te nomination paper chu pawm a ni.

Inthlan thawh khatna hi constituency 38-ah neih a ni dawn a, February 1-8 chhung khan nomination paper thehluh hun hi hawn a ni. Nilai khan paper thehluhte hi enfiah nghal a ni a, nomination paper lut zingah pakhat chiah hnawl a ni. February 11 thleng candidate-te tan inhnuhdawh theih a la ni ang.

Imphal West district-a inthlan neihna tur bial 13-ah candidate 56 an awm dawn a, Imphal East-a seat 10-ah candidate 45, Churachandpur leh Pherzawl district-a assembly bial parukah candidate 34, Kangkokpi district-a bial pathumah candidate 18 an awm dawn a ni.