Hizbul Terrorist man an nih hnuah NIA in case ziaklut

Assam-a Hizbul Muja­hideen firfiak pawl man an nih chungchang chhuichianna turin National Investigation Agency (NIA) chuan Nilaini khan case an ziaklut tawh a, firfiak pawl chhuizuina hna NIA chuan a kutah a la dawn a ni.

Pathianni khan NIA hian Assam-a firfiak pawl awm chungchang hi an chhui dawn tih an lo sawi tawh a, Nilaini khan case hi an ziaklut ta a, a hmain Uttar Pradesh police-te kutah he case hi a awm a ni.

Thla hmasa lawk khan UP Police-ten HM firfiak pawl mi pakhat Kanpur mi an man hnu lawkah Assam police-te chuan HM firfiak pawl nena inkungkaihna nei nia hriat mi pariat an state chhungah an man ve leh a, hemi avang hian hmarchhakah hian HM-te hian bu khuar an tum nia hriat a nih thu police-te chuan an lo sawi tawh nghe nghe.

Assam Police, Special Director General (Special branch) Pallab Bhattacharya chuan HM firfiak pawl mi Qamar uz chu UP aṭangin Thawhlehni khan an kutah hlan a nih thu sawiin nimin khan local court-ah hruai a nih dawn thu a sawi. Court-a a inlan zawh hnu hian UP-ah thawnlet leh a nih dawn thu a sawi bawk.