EC-in Manipur inthlan neih hun tur sawn

Election Commission chuan Manipur assembly inthlan neih hun tura a ruat chu a sawn.

Manipur inthlan hi thawh hniha neih tur niin, February 27 leh March 3-a vote thlak tura tih a ni. Mahse February 27 hi Pathianni a nih avangin, he ni hi Kristiante ni serh leh ni pawimawh a nih avangin pawl hrang hrangin sawn turin an ngen a ni. Manipur mipui, maktaduai thum chuang zinga 41% chu Kristian an ni. Hemi hnu hian EC chuan vote thlak ni tura ruatte hi ennawnin, February 28 leh March 5-ah a sawn ta a ni.

ECI secretary Sanjeev Kumar Prasad chuan thuchhuah siamin, Commission-in ngun taka a ngaihtuah ṭhat hnuah, Representation of the People Act, 1951-a section 153 hnuaiah Manipur Legislative Assembly inthlan neih hun tur hi sawn a nih thu a tarlang.

Inthlan neih tur atana state inbuatsaihna te enpuiin February 7 leh 8 khan ECI team chuan Manipur hi an lo tlawh tawh bawk a ni. An cham chhung hian political party hrang hrang aiawh te, chief secretary, director general of police leh state level officer te, chief electoral officer, district election officer, superintendent of police, director general of Assam Rifles leh law enforcement agency-te an kawm a ni.

Vote tlate hi March 10-ah chhiarin result puan nghal a ni ang.

Hmeichhe hlang enkawl polling station 500 chuang awm dawn
Assembly inthlan neih tura vote thlakna, polling station zinga 529 chu hmeichhe hlang enkawlna hnuaiah dah a ni dawn.

Manipur chief electoral officer Rajehs Agrawal chuan district 11-a polling station 529 enkawltu tur staff chu hmeichhe hlang vek dah an ni dawn tih a sawi. Heng zinga polling station 130 chu Imphal East district-a mi niin, Churachandpur-ah 110, Thoubal-ah 71, Imphal West-ah 53, Bishnupur-ah 50, Ukhrul-ah 45, Tamenglong-ah 33, Chandel-ah 20, Kangkokpi-a pakua, Jirbam-ah panga leh Senapati district-ah pathum a awm dawn a ni.

State pumah polling station hi 2,968 siam a ni dawn a, vote thlak ni hian model polling station 115 siam a ni bawk ang.