March 11-ah AP budget session ṭan dawn

Arunachal Pradesh Legislative Assembly budget session chu March 11 aṭangin neih ṭan a ni dawn.

Governor Brig (Retd) Dr BD Mishra chuan March 11, chawhma dar 10 aṭanga budget session neih ṭan tur hian a ko a, session hian March 17 thleng a awh ang.

Finance changtu, deputy chief minister Chowna Mein chuan financial year 2022-23 atana state budget estimate a pharh dawn a, hei hi AP-a BJP sorkarna hnuaia budget pharh ṭum ngana tur a ni. Session chhung hian sorkar bill pawimawh tak tak pharh a nih rin a ni bawk.

Arunachal Pradesh chuan state mipuite bakah sorkar department hrang hrangte chu budget siam tura rawtna an neihte thehlut turin a sawm a, rawtna thehluh zinga a ṭha pathum thlan chhuah chu lawmman, Rs 50,000 ṭheuh a pe dawn a ni.