Assam-in March 6-ah municipal board inthlan buatsaih dawn

Assam sorkar chuan March 6 hian Election Commission of India (ECI) guidelines leh Covid-19 protocol-te zawm chungin, municipal board 80-ah inthlan a buatsaih dawn.

State election commissioner (SEC) Alok Kumar chuan Assam-a civil election neihah a ṭum khatna turin polling station zawng zawngah electronic voting machine (EVM) hman a ni dawn tih a sawi.

"March 6-ah inthlan hi buatsaih a ni dawn a, March 9-ah vote chhiar a ni ang. February 15 thleng nomination paper thehluh theih niin, inhnukdawk duhte tan February 20 thleng hun hawn a ni bawk," tiin SEC chuan a sawi. Vote thlakna tur hian EVM 5,900 ruahman ani a, heng khawl hmang hian inthlan felfai taka neih an tum thu a sawi.

Municipal board 80 hnuaiah hian ward/seat 977 a awm. Silchar Municipal Board (SMB) tel loin, municipal board dang zawng zawngah inthlan hi neih a ni ang. Polling booth 2,054 siamin, inthlanna duty tur hian mi 20,000 - 25,000 ruat an ni dawn tih Commission chuan a tarlang.

Covid-19 hri leng avangin inthlan neih tur atan hian road show; cycle, motorcycle leh vehicle rally-te chu Ferbuary 15 thleng neih khap a ni a, door-to-door campaign-ah pawh candidate mi 15 chinin an zui phalsak a ni. SEC chuan February 15-ah state chhunga hri leng dinhmunte an ennawn leh dawn a, state sorkarin hri leng chungchanga kaihhruaina a siamte a tidanglam a nih chuan, anni pawhin inthlan neih tur puala kaihhruaina an siamte an tidanglam ve leh dawn tih a sawi.