Hmarchhak bialah telephone nei lo police station 371 a awm

Hmarchhak bialah telephone awm lohna police station 371 a la awm a, heng zingah 43 chuan mobile phone emaw, wireless device dang emaw biak pawh theihna engmah an la nei lo.

He statistics hi Parliamentary Standing Committee-in Home Affairs chungchanga 'Police -Training, Modernisation and Reforms' report a siam, kar liam taa Parliament-a pharhah a tarlang a ni. Hei hi Bureau of Police Research and Development-in kum 2020, January 1-a an siam a ni.

Meghalaya-a police station 74 zinga 62 chuan telephone an nei lo a, heng zinga pakua chuan motor, mobile phone leh wireless device pawh an kawl lo. Manipur-a police station 84 zinga pakua chuan motor an nei lo a, 64 in telephone an nei lo a, 11 in wireless leh mobile device an nei lo bawk.

Arunachal Pradesh-ah chuan police station 91 zingah 54-in telephone an nei lo a, pali in motor, mobile leh wireless device kawl an nei lo a ni. Assam-ah police station 344 awmin heng zinga 144 chuan telephone an nei lo a, pali in motor kawl nei loin, pakhat chuan mobile leh wireless device eng chi mah a nei lo bawk a ni.

Nagaland-ah police station 86-te chuan motor an kawl vek a, mahse 36 chuan telephone an nei lo a, heng zinga 18 chuan wireless device pawh an nei lo bawk. Tripura-ah pawh police station 82 ten motor an kawl vek laiin, 14 chuan telephone an nei lo a, mahse mobile leh wireless device erawh an nei vek thung.

Hmarchhak state zingah Mizoram leh Sikkim chu police station tinah motor, telephone, wireless device leh mobile awm kimna awmchhun an ni.

Report-ah hian India ram pumah telephone awm lohna police station 638 a awm thu leh, motor kawl lo station 257 bakah, wireless/mobile device awm lohna station 143 a awm thu tarlan a ni. Kum zabi 21-naah pawh police station heti zat, telephone emaw, wireless connectivity nei lo an la awm chu ngaihven ngai tak tih a sawi. Heng zingah hian helpawl chet hluarna state-te bakah Jammu and Kashmir-te pawh an tel tih a tarlang.

Ministry of Home Affairs (MHA) chu state-te chuan police station tinte motor leh biakpawh theihna hmanrua nena thuam vek tura hrilh tura an duh thu Committee chuan a sawi bawk.