AP-ah zirlaite hnam thuam inbel hun siamsak dawn

Arunchal Pradesh-a private school-te chuan an zirlaite chu kar khatah ni khat an hnam thuam, traditional dress nena class kal hun an siam dawn.

Arunachal Pradesh Private Schools and Children Welfare Association (APPSCWA) chuan he ruahmanna hi tualchhunga puantahtute a thlawpna leh an puihna pakhat a nih thu a sawi. He ruahmanna hi academic session 2022-23 aṭangin an kalpui nghal dawn a ni.

APPSCWA vice president Tarh Jhony chuan school 180 chuang aiawhte kalkhawmin he thu hi an rel tih a sawi a, kartin Thawhṭanni apiangah zirlaite chu an hnam thuam nen school an kal ṭhin dawn a ni, a ti. Ni dangah erawh chuan school uniform bak inthuam phal a ni dawn lo thung.

Jhony chuan, "Arunachal-ah hian tribe leh sub-tribe 100 chuang zet an awm a, zirlaite hian an hnam thuam zinga an duh ber an inbel thei ang. Non-tribal-te pawhin an traditional dress an inbel dawn bawk a ni,"a ti. Mahse hnam thuam bakah a chei belhna dangte erawh chu phal a ni dawn lo thung.