Manipur BJP-in party thupuangtu hnawtchhuak

State assembly inthlan neih tur atana inbuatsaih mek karah, Manipur BJP chuan an party chief spokesperson, Chongtham Bijoy Singh chu party dan a bawhchhiat avangin party aṭangin kum ruk chhung a hnawtchhuak.

Chongtham Bijoy Singh chuan BJP kaihhruai ṭangrual sorkara an thawhpui, National Peolple's Party (NPP) chu party dang ringa khawsa, kum nga chhung ṭangrual sorkar an siam tana chhiatna niin a sawi a ni.

BJP aṭanga hnawhchhuah a nih hnuah, Singh chuan state assembly inthlan lo awm turah a hmaa din a lo inbeiseina, Uripok Kh Suresh biala JD(U) candidate chu a thlawp dawn tih a sawi ve nghal bawk. Eirukna a dodal tlat avangin BJP chuan candidate ah an dah duh lo niin a sawi.

"Langsar taka eirukna dodalin, ka duh loh thu pawh ka auchhuah pui fo a, hei vang hian party ticket pawh ka chang lo a ni. Show-cause notice pawh engmah min pe loin party aṭangin min hnawtchhuak bawk. Hei hi state BJP president ruahman vek a ni. Uripok bialah pawh JD(U) candidate chu ka thlawp dawn a ni," a ti.

BJP state president A Sharda Devi chuan Singh hi party inkaihhruaina dante bawhchhia a, party duh dan kalh zawnga a awm avangin hnawhchhuah a nih thu a sawi.