Manipur Assembly Election : Inthlan thawh khatnaah candidate 173 awm

Manipur assembly inthlan thawh khatna, February 28-a neih tur tana chuh tuma nomination paper thehlutte inhnuhdawh theih hun a tawp hnuah, inthlan chuh tum candidate 173 an awm.

Inthlan thawh khatna chuh tuma nomination paper thehlut hi mi 175 an awm a, mahse independent candidate pahnih - P Somorjit leh Thangminlien Kipgen-te an inhnuhdawh leh avangin mi 173 an awm dawn ta a ni. Candidate zingah hian hmeichhia 15 an tel.

February 28 hian Manipur assembly seat 60 zinga seat 38-ah vote thlak a ni dawn a, heng zinga seat 29 chu valley district - Imphal West, Imphal East leh Bishnupur-a mi niin, a bak seat kua hi hill district - Kangkokpi, Churanchandpur leh Pherzawl-a mi an ni.

Inthlan thawh khatnaa chuh turah hian BJP hruaitu zingah chief minister N Biren Singh (Heingang seat), assembly speaker Y Khemchand Singh (Singjamei), minister - Th Biswajit Singh (Thongju), S Rajen Singh (Lamsang), O Lukhoi Singh (Wangoi) leh Vungzagin Valte (Thanlon)-te an tel.

National People's Party (NPP) hruaitu leh deputy CM Yumnam Joykumar pawhin Uripok bialah a ding dawn a, NPP MLA L Jayantukumar Singh pawh inthlan thawh khatnaa chuh turah hian a tel bawk.

Manipur Pradesh Congress Committee (MPCC) president leh senior MLA N Loken Singh chu Nambol bialah a ding dawn a, party MLA TN Haokip chu Saikot bialah a ding thung ang.

Inthlan thawh khatnaah hian independent candidate 18 an awm dawn tih joint Manipur Chief Electoral Officer (CEO) Md S Daulat Khan chuan a sawi.

March 5-a inthlan thawh hnihna neih tur atana nomination paper thehluh hun pawh a zo tawh a, mi 96-in nomination paper an thehlut. Nimin khan paper-te hi enfiah a ni a, Nilaini thleng inhnukdawk duh tan hun hawn a ni ang.

Manipour CEO chuan inthlan neih tur atana inbuatsaih dante thlirin special observer, police leh expenditure observer-te chu Imphal-ah meeting a neihpui tawh bawk Observer-te chuan polling station, commissioning hall, strong room leh counting hall ṭhenkhate an enfiah thute sawiin, district election officer (DEO) leh returning officer te meeting an neihpui bawk a ni.