Tripura : IPFT-in state hran phutna memorandum thehlut dawn

Tripura-a rorellai, BJP thawhpui Indigenous People’s Front of Tripura (IPFT) chuan an party thil phut hrang hrang tharthawh leh turin resolution eng emaw zat an pass a, heng resolution zingah hian state hran din phutna pawh a tel.

Party central executive committee meeting, Dasarath Dev Smirti Bhavan-a neihah heng resolution-te hi an pass a ni. An thil phut chungchangah hian Tripura chief minister Biplab Kumar Deb, governor Satyadeo Narain Arya bakah prime minister Narendra Modi leh union home minister Amit Shah-te hnenah memorandum an thehlut dawn a ni.

IPFT general secretary leh BJP kaihhruai state sorkara tribal welfare minister Mevar Kumar Jamatia chuan an thil phut pui ber chu Tripura-a sixth schedule area-a state hran din a nih tih a sawi. Hei bakah TTAADC area thuam chak a ,state sorkarin a ngaihven ṭhat an phut a, hemi atan hian district council chu territorial council-a let turin an nawr dawn tih a sawi.