Meghalaya-in sa-a intodelhna turin hma lak tum

Meghalaya chief minister Conrad K Sangma chuan an state-a sa an eiral zinga 50% dawn chu state pawn lam aṭanga lakluh a nih thu sawiin, saa an intodelhna tura livestock sector lama ṭan a ṭul thu a sawi.

CM Sangma chuan, "State chhunga sa kan eiral - vawksa, bawngsa, kelsa, arsa, sangha leh sa aṭanga thil siam zinga 50% dawn hi state pawn lam aṭanga lakluh a ni. State chhung livestock business hi Rs vbc 4,500 hu vel a ni a, heta ṭanga Rs vbc 2,250 chu state pawn lamah a chhuak zel tihna a ni," tiin West Garo Hills district-a Canol hmuna Dairy Complex thar siamna tur lungphum a phumnaah a sawi a ni.

State chhunga dairy sector tihchangtlunna turin sorkar chuan investment pawh a ti mek tih sawiin, flagship "Dairy Mission" programme hmangin state sorkar chuan bawng vulhtute chawikanna tur ruahmanna hrang hrang a siam thu CM chuan a sawi. State chhunga bawnghnute tam zawk thar chhuah a nih theihna turin state sorkar chuan dairy cooperative society hrang hrangte a thawhpui mek tih a sawi bawk.

West Garo Hills-a Dairy Complex hi National Programme for Dairy Development of the Centre bultumin siam a ni dawn a, anni hian Rs vb 9.15 tumin, West Garo Hills-a Milk Producers Union chuan cheng nuai 86.27 an pe bawk a ni.