AP Congress ṭhalaite'n Assam CM lim an hal

Arunachal Pradesh Youth Congress (APYC) chuan Thawhṭanni khan Assam chief minister Himanta Biswa Sarma-a'n Congress hruaitu Rahul Gandhi chungchang a sawi dan avanga lungawi lohna lantirin, CM Sarma lim an hal.

Youth Congress chuan prime minister Narendra Modi hnenah Assam CM chu ban turin an phut nghal bawk.

Rahul Gandhi-a'n kum 2016 leh 2019-a India Army-in Pakistan rama surgical strike an neih chungchang finfiahna a phut avangin, Sarma hian Congress hruaitu hi na takin a sawisel zui a ni. Uttarakhand-a rally a neihah Sarma chuan Rahul Gandhi beiin, BJP chuan prime minister hlui Rajiv Gandhi fapa a ni tih finfiahna pe turin an phut ve kher lo tih sawiin, Indian Army hnena finfiahna pe tura phut turin dikna a nei lo, tiin a sawi.

Assam CM hi Rahul Gandhi leh a pa chungchang a sawi dan avangin dem a hlawh zui hle a, mahse a hnuah amah hian a thusawi chu Congress lamin an lakawi niin a sawi leh thung a ni.

APYC president Tarh Jhony chuan CM Sarma thiltih dan chu a puitlin loh thlak hle tih sawiin, Rahul Gandhi leh a chhungte mimal taka a beih avangin ngaihdam a dil ngei tur a ni, a ti. "Sarma hian a chungah Assam mipuite chauh ni lo, Arunachal Pradesh mipuie pawh an thinrim hle tih hria se kan duh a ni. A chet dan a puitling loin, Assam chief minister ni zel turin a tling lo a ni. Hei vang hian a rang thei ang berin PM hian a ban tir a ngai a ni," a ti.

Sarma hian February 20-a Arunachal Pradesh-in statehood day a lawmnaah tel a tum a, an state a tlawh hunah hian Youth Congress chuan a laka lungawi lohna lo lantir leh an tum tih an sawi bawk.