Manipur-ah BJP an chak chuan CM-ah Biren Singh dah leh dawn

Bharatiya Janata Party (BJP) chuan Manpur assembly inthlan lo awm turah BJP chuan thuneihna an chan chhunzawm leh a nih chuan, chief minister ṭanglai N Biren Singh bawk chu a CM leh dawn tih a puang.

BJP thupuangtu leh in-charge of Manipur, Sambit Patra chuan Thawhṭannia Imphal West district-a election rally neihah he thu hi sawiin, N Biren Singh hruaina hnuaiah BJP chuan sorkarna an siam leh ngei dawn tih a sawi bawk. "Biren Singh hruaina ṭha tak leh sorkar inrelbawlna fel tak avangin, BJP chuan inthlanah hian assembly seat 60-a hmun thuma hmun hnih tal chu a la leh ngei dawn a ni. Hmasawnna hna a thawhte leh state chhunga boruak ṭha leh muanawm tak a siamte chuan BJP chu a chaktir leh dawn a ni," tiin CM Singh chu a fak hle.

Sambit Patra-a rally neihah hian defence minister Rajnath Singh, chief minister N Biren Singh, BJP state president Adhikarimayum Sharda Devi leh party hruaitu dangte pawh an tel a ni.

BJP hian Chief Minister tur chungchang chu inthlan zawh hnuah chauh ngaihtuah a ni dawn tih a lo sawi tawh a, mahse an thu hi sutin CM Singh bawk chu an chak anih chuan dah chhunzawm an tum tih an puang leh ta a ni.

Defence minister Rajnath Singh pawhin thu sawiin, PM Modi leh CM Singh-te theihtawp chhuahna avangin kum nga chhungin Manipur chu a inthlak danglam nasa hman hle tih a sawi. Hel pawikhawihna thlengte pawh a tam zawk thunun a ni tawh a, Manipur state hmasawnna chu state dangte nen pawha khaikhin tham a ni tawh a ni, a ti.