Kum 4 chhungin CPI(M) hruaitu leh worker tam tak thah an ni : Manik Sarkar

Tripura-a eptu party, CPI(M) hruaitu, chief minister hlui Manik Sarkar chuan an state-a BJP-IPFT sorkar hnuah, kum li liam ta chhungin CPI(M) hruaitu leh worker eng emaw zat thah an ni tawh tih a sawi.

"Kum li liamta chhungin CPI(M) hruaitu leh worker 24 zet thah an ni tawh a, heng tualthahna thlengah hian rorelna dik engmah hlenchhuah a awm lo" tiin South Tripura district-a Kamalpur khuaa chanchinbu mite a kawmaah a sawi a ni.

Hetih lai hian rorellai party lam chuan he puhna hi nasa takin an pha thung. BJP thupuangtu Nabendu Bhattacharjee chuan,"Kum 2018 assembly inthlan zawh hnuah politics vanga inthahna hi a thleng tawh ngai lo zawk a ni. A hma chuan inthlan zawh hnuah buaina nasa tak a chhuak fo a ni," a ti.

Manik Sarkar chuan BJP-IPFT sorkar hnuaiah mipuite chu aw chhuah theih loa hrekbeh an ni a, inthlanna dik leh felfai taka kalpui a awm tawh lo bawk tih a sawi. Kum 2018 inthlan dawna mipui an bumte chuan bum an nih dante pawh an hrechhuak chho ṭan tawh a ni, tiin a sawi.

"BJP MLA te, an party chhuahsana Congress party zawmte chuan langsar takin BJP kaihhruai sorkar chu an sawisel a, BJP an lo zawm kha an inchhir takzet a ni," tiin tun hnaia Congress party-a lut, Sudip Roy Barman leh Asish Saha te chungchang a sawi zui bawk. Sorkar rorel dan dik tawk lo tak do letna hun a thleng mek tih a sawi a ni.