Sikkim-in ṭanpuina Rs vbc 87.84 dawn

Union home minister Amit Shah kaihhruai high-level committee chuan kumina leilung chhiatna, thlipui tleh, tuilian leh leimin nasa tak tuartu state pangate chhawmdawlna pek belh a remti. An zingah hian Sikkim pawh a tel. 

State pangate hnena chhawm­dawlna pek tur hi cheng vaibel­chhe 4,381.88 a ni a, Sikkim chuan sorkar laipui aṭangin cheng Rs vbc 87. 84 a dawng dawn a ni. Chhiatna thleng tuartute hnena ṭanpuina hi National Disaster Response Fund (NDRF) aṭangin pek an ni ang. 

Sikkim state hian tuilian leh leimin nasa tak a tawrh avangin sorkar laipui aṭanga puihna hi a dawng dawn a ni. An state-a leilung chhiatna thleng hi sorkar laipui tirh, Inter-Ministerial Central Teams (IMCT) chuan a lo endik tawh a ni. 

Kumina ruah sur nasa avangin Sikkim-ah hian leimin leh tuilian ṭum eng emaw zat a thleng a, tuilian hi Legshep, Reshi, Rohtak, Baiguney, Pippaley, Sikkip leh Jorethang bialten an tuar nasa zual a ni. North Sikkim-a Upper Djongu bialah tuilian avangin chenna in 19 a chhiat bakah, chhungkaw 35 ten harsatna an lo tawh phah tawh bawk. 

Sorkar laipui chuan Sikkim bakah West Bengal-in cylcone Amphan a tuar avangin ṭanpuina  Rs vbc 2,707.77 a pe dawn bawk a, Odisha tan Rs vbc 128.23, Maharashtra tan Rs vbc 268.59, Karnataka tan Rs vbc 577.84 leh Madhya Pradesh tan Rs vbc 611.61 a pe dawn bawk a ni. 

Hei bakah hian prime minister Narendra Modi chuan heng state-a leilung chhiatna thleng vanga thi chhungte hnena ralna Rs nuai hnih ṭheuh leh, hliam tuarte hnenah Rs 50,000 ṭheuh pek an nih tur thu a puang bawk. 

Heng sum hi NDRF leh State Disaster Response Fund (SDRF) aṭangin pek an ni ang.