Assam CM-in journalist thih dan CID chhui tir

Assam chief minister Sarbananda Sonowal chuan motor-in a sut avanga  thi, journalist Parag Bhuyan thih dan chu Assam police-a criminal investigation department (CID) a chhui tir. CID team hian Inrinni aṭang khan Bhuyan thih dan hi an chhui ṭan nghal. 

Private Assamese news channel, Pratidin Time-a thawk, Parag Bhuyan hi kar liam ta Nilaini zan khan Kako­pathar-a a chenna in bulah motor chak taka rawn tlanin suin hliam na tak a tuar a, damdawi-ina hruai a nih hnuah Ningani khan a thi a ni. A sutu motor, driver James Muhra leh handyman Baba Bordoloi-te chu Arunachal Pradesh-a Kakopathar ramri, Namsai-ah police-ten an man a ni.

Pratidin Time editor-in-chief Nitumoni Saikia chuan Bhuyan hi tum reng vanga thah a ni tih a sawi a, he pawikhawihna a thlen aṭanga darkar 15 hnua Chief Minister a inrawlh hnuah chauh police-te chu an che chhuak niin a sawi. Bhuyan hi journalist huaisen tak, Kakopathar biala eirukna leh dan kalha thiltih awm a tih a report ṭhin avanga thah nia an ngaih thu a sawi a ni, a hma pawhin vauna a lo dawng tawh ṭhin a ni, a ti.