Manipur : Bijoy-a'n state BJP President a khing

Manipur BJP chief spokes­person hlui, Chongtham Bijoy Singh chuan an party aṭanga dan loa bana puhin, Nilaini khan state BJP president Adhikarimayum Sarda Devi chu court-ah a khing.

Specific Relief Act, 1963-a Section 34 hnuaiah Bijoy Singh hian party hotu khinna hi a thehlut a ni.

Imphal West-a Court of Civil Judge (junior division) chuan ngaihtuah nghalin, BJP chief hi February 24-a court-a inlan turin a hriattir. Hei bakah hian Bijoy Singh-a'n a puhna chungchanga insawifiahna chu ziaka thehlut turin a ti bawk.

Bijoy Singh hian Manipur-a BJP thawhpui, National People's Party (NPP) chu party dang rinchhan, kum nga chhunga ṭangrual sorkar an siam tana chhiatna thlen tu niin a sawi a ni. Hemi hnu hian Manipur BJP president Sarda Devi hian Bijoy Singh hi party inkaihhruaina dan bawhchhiaa puhin, thla ruk chhung atan an party aṭangin a hnawtchhuak a ni.

Party aṭanga hnawhchhuah a nih hnu hian Bijoy Singh chuan assembly inthlan lo awm turah BJP ticket-a din a lo beiseina leh a chan tak loh, Uripok Kh Suresh bialah chuan JD(U) candidate a thlawp tur thu a sawi nghal a ni. Eirukna a dodal tlat avangin BJP chuan candidate atan an dah duh lo niin a sawi.

Seat 60 awmna, Manipur legislative assembly inthlan hi thawh hniha neih a ni dawn a, February 28 leh March 5-ah vote thlak a ni ang.