Ratan Tata hnenah 'Assam Baibhav' hlan

Industrialist Ratan Naval Tata hnenah Nilaini khan Assam sorkar chuan Assam-in civil mi hnenan chawimawina a pek sang ber, 'Assam Bhaibhav' a hlan.

Mumbai-a Colaba-a Taj Wellington Mews-a hun buatsaihah, Tata Trust chairman hian Assam chief minister Himanta Biswa Sarma hnen aṭangin chawimawina hi a dawng a ni.

'Assam Bhaibhav' hian chawimawina thuziak, medal leh pawisa fai Rs nuai nga a keng tel a, Ratan Tata hi Assam-a cancer natna enkawlna kawnga a thawh hlawk avangin state sorkar chuan he chawimawina hi a hlan.

Kumin January 24 khan Srimanta Sankaradev Kalakshetra, Guwahati-ah official award ceremony hi buatsaih niin, governor Jagdish Mukhi chuan field hrang hranga civil mi chawimawina dang, 'Assam Saurav' leh 'Assam Guarav' chu mi 18-te hnenah a hlan a ni. Mahse he hunah hian Ratan Tata hi a tel thei lo a, hei vang hian Nilaini khan CM Sarma chuan Mumbai-ah award hi a hlan ta a ni.