Assam-ah DNLA hel 52 inpe

Assam-a Karbi Anglong district-ah Nilaini khan Dimasa National Liberation Army (DNLA) helpawl member 52-te chu an ralthuam nen sorkar kutah an inpe. Hel inpe zingah hian hmeichhia pali an tel.

Additional director general of police (special branch) Hiren Chandra Nath chuan Dhansiri-a DNLA designated camp-a he programme hi hman a nih thu a sawi. "An vaiin mi 52 an inpe a ni. Heng mite hi Nagaland hmun hrang hranga biru an nih avangin an inpe hma thei lo a ni," a ti. Hel inpeten ralthuam an thehlut zingah hian carbine pakhat, pump action gun pakhat, .22 rifle pahnih, .303 rifle pakhat, hand grenade, .32 pistol pahnih a tel tih Nath chuan a sawi bawk.

DNLA hi kum 2019-a Dimasa hnam tana inrelbawlna hran siamna tur nawrna atana din a ni. Dimasa hnam hi Assam bakah Nagaland-ah an cheng a ni.

Nikum September 7 khan chief minister Himanta Biswa Sarma-a'n muanna kawng zawng tura a ngenna chhangin, DNLA hian thla thum chhung inkahhai an puang a ni. Nikum December thla khan an pawl member 113 chu an ralthuamte dahthlain sorkar kutah an lo inpe tawh bawk.

DNLA hi nikum August 27-a Dima Hasao district-a lungalhthei phurtu truck driver panga thahnaa inhnamhnawiha puh a ni.