Assam organisation-in Nagaland kawng dansakah vau

Karbi Anglong, Assam-a pawl hrang hrangte chuan Nagaland nena an ramri buaina chinfel phutin, an thil phut a hlawhtling lo a nih chuan November 20-ah Nagaland pawhtu kawngpui dansakah an vau. 

Ramri chungchangah Assam leh Nagaland state sorkar aiawh leh Karbi Anglong Automous Council (KACC) aiawhte chu inbiakna nei a, a chinfel dan ngaihtuah turin an phut a ni. He thil phuttu zingah hian Karbi Students' Assocation (KSA), United Karbi Anglong Women Association, Karbi Anglong Women Justice Forum, Hills Progressive Youth Association leh Students and Youth Council te an tel. 

KSA president Simeon Rongphar chuan Nagaland-a Naga-te chu Karbi Anglong-a Daldali reserve forest chinah an lut fo a, hei hi Dimapur district thuneitute pawhin an thlawp tlat niin a sawi. Assam ram china lutte hian border pillar No 1 leh No 3  an tihchhiat bakah, Daldali reserve forest chu forest land ni loin, Nagaland ta a nih thu te an sawi a, Nagaland sorkar pawhin land patta a pek chhuah thute an sawi niin Rongphar chuan a tarlang. 

Nagaland sorkar thiltih dan chu an dem thu sawiin, kum 1963-a Assam aṭanga Nagaland state siam a nih pawh khan Daldali RF chu Karbi Anglong huam chhungah dah a ni, a ti. 

November 20 thleng buaina ramri chungchanga an buaina chinfel dan ngaihtuah tura meeting nei turin hun an pe a, meeting hi an huaihawt lo emaw, engmah thutlukna mumal an nei lo emaw a nih chuan Nagaland state luhna kawngpui chu an dang dawn tih an sawi. 

Hemi avanga harsatna a thleng a nih pawhin Assam, Nagaland sorkar leh KAAC chu a mawhphurtu an ni ang, tiin KSA president chuan a sawi.