Manipur assembly election ; Inthlan thawh 1-naa candidate zingah criminal case nei 37 an awm
Manipur assembly inthlan thawh khatna, February 28-a assembly bial 60 zinga 38-a neih tura candidate-te affidavit thehluh zirchianna aṭangin, candidate 37 (21%) chu crimimal case nei lai an ni a,an zinga 27 (16%) chu thubuai rip tak nei an ni.
Association for Democratic Reforms report-in a tarlan danin, criminal case neilai BJP candidate zingah 11 an awm a, JD(U)-ah pasarih, Congress party-ah pariat, NPP-ah pathum an awm. Thubuai rip tak, serious criminal case nei hi BJP-ah 10, JD(U)-ah panga, Congress-ah pali leh NPP-ah pahnih an awm bawk.
Candidate zingah hmeichhe laka pawikhawihna thlena puha thubuai nei lai pahnih an awm a, tualthah kaihhnawih thubuai nei pahnih an awm a, tualthah tuma puhna thubuai nei paruk an awm bawk a ni.
Inthlan thawh khatna neihna tur, assembly constituency 39 zinga pathum (8%) chu Red alert constituency an ni. Red alert constituency hi candidate zinga pathum emaw, pathum aia tam emaw cirminal case nei awmna a ni.
Cropepati 91 an awm
Candidate 173 zingah mi hausa tawntaw, cheng vaibelchhe khat aia tam nei chin, crorepati 91 (53%) an awm bawk.
Party lian candidate zingah croreparti hi NPP-ah 21 an awm a, BJP-ah 27, Congress party-ah 18 leh JD(U)-ah 14 an awm a ni.
Inthlan thawh khatna atana candidate-te thil neih hi chawhrualin mi pakhatin cheng vaibelchhe 2.51 nei ang an ni.
NPP candidfate 27-te thil neih chu chawhrualin Rs vbc 3.48 a ni a, BJP candidate-te chu Rs vbc 2.84, JD(U) candidate-te Rs vbc 2.67 leh Congress candidate-te thil neih chawhrual chu Rs vbc 1.93 a ni bawk.
Candidate-te kum
Candidate 173 zinga 23 (13%) chu kum 25-40 inkar an ni a, 115 (66%) chu kum 40-60 inkar an ni. Kum 61-80 inkar candidate 33 (19%) an awm a, kum 80 chunglam pahnih an awm bawk.
Inthlan thawh khatnaah hian hmeichhe candidate 15 (9%) an awm bawk a ni.
Inthlan thawh khatnaa candidate zingah hian chief minister N Biren Singh, deputy chief minister Y Joykumar, assembly speaker Y Khemchan-te an tel. Anni bakah minister ṭanglai panga an awm bawk.
Inthlan thawh 2-naah candidate 92 awm
Inthlan thawh hnihna hi March 5-ah assembly constituency 22-ah inthlan thawh hnihna hi neih a ni dawn a, candidate 92 an awm dawn a, an zingah hian hmeichhia pahnih an tel.
March 5-a inthlan neih tura candidate zingah hian chief minister hlui leh Congress leader O Ibobi Singh, deputy chief minister hlui Gaikhangam, minister ṭanglai pali an awm a ni.
Inthlan thawh khatna leh thawh hnihnaa vote tlate hi March 10-ah chhiarin result puan nghal a ni ang.
Rorellai BJP chuan bial 30-ah candidate a siam vek a, Congress chuan candidate 54 a nei thung. BJP thawhpui National People's Party (NPP) chuan candidate 39 leh, Naga People's Front (NPF) chuan candidate 10 an nei. Janata Dal (United) chuan seat 39-ah a chuh dawn a, Communist Party of India chuan seat pahnihah chauh candidate a nei thung.
Inthlan thawh khatnaah hian vote nei 12,02,546, hmeichhia 6,24,447 leh mipa 5,78,099 an awm. A thawh hnihnaah hian vote nei 8,32,416 awmin, an zinga 4,25,192 chu hmeichhia an ni a, mipa 4,07,224 an awm bawk.