Assam University zirlaiten offline exam neih duh lo

Assam University zirlaite chuan university-in offline-a exam buatsaih a tum chu duh loin nawrh an huaihawt.

February 14 khan University chuan thuchhuah siamin, class pawh a tahtawla hawn chhoh a nih tur thu leh, semester exam pawh offline-a buatsaih a nih tur thu a tarlang a ni. Mahse offline exam neih tur hi duh loin, zirlaite chuan a tuk aṭangin nawrh an huaihawt nghal a ni.

Zirlaite hian University main gate bulah ni eng emaw zat lungawi lohna hi an lantir tawh a, online mode veka class an kal laia offline-a exam tir an ni tur chu duh loin, online bawka exam an phut. "Semester dawt leha offline-a class kan kal hunah offline-a exam tur chuan kan inpeih reng a ni. Mahse tun semester pum chu online mode vekin class kan kal a, hei vang hian class kan lak dan ang bawka exam buatsaih hi kan phut a ni," a ti.

Hetih lai hian University chuan zirlai nawrh huaihawtten main gate dan chu dan khalh a ni tiin, an nawrh huaihawtna hmun chu sawn turin an ti bawk.

Offline-a exam buatsaih an phut chungchangah, zirlaite chuan VC leh university thuneitu dang hnenah pawh memorandum an thehlut tawh tih an sawi a, mahse online-a class kal a nih loh avangin zirlai pawlten aw an nei thei lo a, hei vang hian an ngenna pawh hi ngaihsak a hlawh lo niin an sawi.