North East Students’ Organisation in NRC kalpui duh

North East Students’ Or­ga­nisation (NESO) chuan Ninga­ni khan thuchhuah siamin hmar­chhak state zawng zawngah National register of Citizenship (NRC) kalpui an duh thu an sawi.

NESO Advisor Sammujjal Bhattacharya chuan hmarchhak chu Bangladesh mi te tlan­khawmna tur a ni lo, a ti.

Ningani khan NESO ai­awhte hian Union Home Mi­nister Rajnath Singh hmu in hmarchhaka dan loa lutte hriat an nih theihna turin NRC chu hmarchhak pumpuiah kalpui an duh thu an sawi a, Citizenship (Amendment) Bill, 2016 sut an ngiat thu an hrilh bawk.

NESO aiawhte hian Minister of State for Home Affairs Kiren Rijiju hmu bawkin hmarchhaka buaina hrang hrang awm chung­chang an sawipui a ni. Special Education policy an duh thu sawi bawkin hmarchhaka zirna in awm te an ṭhat tawk loh avangin hmarchhak zirlai tam tak chu hmun hla zawkah zirna chhunzawm tura an kal a ngaih phah thu an sawi a ni.

NESO hian tun thla tir khan Citizenship (Amendment) Bill, 2016 an dodal thu hi an lo sawi tawh nghe nghe a, hmarchhak pumpuia ILP kalpui te pawh an lo ngiat tawh bawk.

NESO hnuaiah hian AASU, AAPSU,AMSU, KSU, NSF,GSU, MZP leh TSF-te awmin anni hian Citizenship (Amendment) Bill, 2016 dodalna memorandum hi Joint Committee on Citizenship (Amendment) Bill 2016 Chairman Dr. Satya Pal Singh hnenah pawh an lo thehlut tawh a ni.