Tripura anti- CAA team in MHA official-te hmu dawn

Tripura-a Joint Movement Againts Citizenship Amend­ment Bill (JMACAB) team member parukte chuan Ministry of Home Affairs (MHA) official-te hmu turin Ningani khan Delhi an pan. 

JMACAB team hian union home minister Amit Shah hmuh tum mah se, an hmu thei dawn em tih erawh a la chiang lo a ni. Home minister leh MHA official-te hnenah hian sorkar dan siam thar, CAA chu Tripura state pum huam tel tir lo tura ngen an tum a ni. JMACAB member-ah hian INPT, NCT, IPFT, Tripaha, TSP leh TSF bakah zirlai pawlte pawh an tel a ni. State chhunga tribal party-te chuan an thil phut lantirin Tripura Areas Autonomous District Council headquarters-ah nawrh an lo huaihawt tawh bawk. 

"Ministry of Home Affairs lamin min koh avangin kan thil phut sawipui tur hian Delhi kan kal dawn a ni. CAA hi Tripura huam tel tir lo turin kan phut chhunzawm zel dawn a ni," tiin JMACAB convener Antony Debbarma chuan a sawi. 

Nikum December 12 khan Amit Shah chuan JMACAB hnenah hian CAA dodaltute thil phutte lo ensak a tiam a, mahse tun thlengin hma lakna a  la awm lo a ni. Hetihlai hian Delhi-a awm mek, INPT general secretary Jagadish Debbarma chuan Supreme Court-ah CAA khinna hi thehluh a tum.