Manipur-a NPP candidate pa silaiin kap

Manipur assembly inthlan neih tura Andro biala National People's Party (NPP) candidate, L Sanjoy Singh-a pa chu mi tu tih hriat lohten silaiin an kap tih deputy chief ministee Yumnam Joykumar chuan a sawi.

L Sanjoy Singh-te pafa hi Zirtawpni liam ta khan an chenna inah anmahni thlawptu mi thenkhatte nen inthlan kaihhnawih thil sawiin an inhmukhawm a ni. Awm khawmte hi mi tu tih hriatlohten silaia kapin, Singh-a pa hi a darah an kap fuh a, damdawi-in panpui nghal a ni.

Manipur-a NPP tana cam­paign-a awm mek, Megha­laya chief minister leh NPP president Conrad K Sangma chuan damdawi-inah hian tlawh nghalin, he thil thleng hi a dem thu a sawi.

Sangma chuan, "Hetiang thil a thleng hi a pawi takzet a ni. Chief electoral officer pawh hmuin kan sawipui dawn a ni. Kim 2002 aṭang khan Manipur-ah hian ka lo campaign ve ṭhin tawh a, tun ṭum inthlan tur anga pawikhawihna thleng nasa hi ka la hmu ngai lo. Heng thil hi tihtawp an ni vat tur a ni," a ti.

Manipur Dy CM, NPP hruai­tu ni bawk Joykumar pawhin tuna an boruak awmdan thlir chuan inthlanna felfai leh zalen tak a awm thei dawn lo niin a sawi a, venhim hna thawk turin paramilitary force dah belh an phut thu a sawi bawk.