MU buaina chingfel turin Theihtawp chhuah tiam

Manipur University vice-chancellor, A.P Pandey chhuak tura phutna avanga buaina chu chinfel hleihtheih a la ni lo a, kar liamta Ningani khan pro vice-chancellor atana ruat professor, K. Yugindro chu suspend a ni ve leh.

K. Yugindro suspend a nih hnu hian Manipur High Court chuan Univer­sity thuneihna hi chief secretary hlui Jarnail Singh kutah a dah a, ani hian vice chancellor office chu a luahlum hrih dawn a ni.

VC office-a luah tur hi MU Community-te chuan lo hmuakin an lo lawm a, Manipur University Staff Association (MUSA) president chuan thuneitu thar chu an lo lawm thu sawiin varsity staff zawng zawng chuan ṭha taka an thawhpui dawn thu a sawi.

Manipur University Students’ Union (MUSU) president pawhin Court in VC charge la tura a ruat thar avang chuan ni 130 zet hnuah university-ah boruak a pangngai leh thei tawh dawn tih a sawi a, zirlaite chuan beiseina thar an neih thu a sawi ve bawk.

Manipur University Teachers’ Association (MUTA) president chuan Court in an hotu atana a ruat thar hnuaiah chuan hun rei lote chhungin bo­ruak a pangngai leh dawn thu a sawi a ni.

Amah lawmna neih zawhah hian Jarnail Singh chuan MU Community ten an lawmna chu lawmawm a tih thu sawiin buaina an neih ang te pawh chinfel thuai a intiam. Jarnail chuan buaina chinfelna tur sawi tur chuan a office chu a inpeih reng thu sawiin tu tan pawh a inhawng tih a sawi.

Jarnail Singh hi IAS office ṭhin niin Prime Minister office joint sec­retary-te pawh lo ni tawh a ni a, 2008 kumah khan Prime Minister's Award for Excellence in Public Administration pawh a lo dawng tawh nghe nghe a, 2004 aṭanga 2008 chhung khan Manipur Chief Sec­retary hna a lo thawk tawh bawk a ni.