Guwahati-ah bomb puak, pali hliam; ULFA in an tih a nih thu sawi

Guwahati-a Brahmaputra lui kamah Inrinni zingah khan bomb a puak a, mi pali in hliam an tuar.

Bomb puahna hmun hi Pan Bazar-ah niin police station aṭang pawhin a hla lo hle a, Durga Puja tura mipui inbuatsaih hunlai a nih avangin bazar kal pawh an tam hle nghe nghe a, bomb puak hian mipui a tichiai hle a ni.

Police-te chuan hliam tuar mi pali te hi damdawi-in hnai berah tlanpui nghal an nih thu sawiin an ngaihtuahawm lutuk lo niin an sawi.

Senior police officer Ranjan Bhuyan chuan bomb puahna hmun chu side drain siamnaa hman tur lei dahkhawmnaah hmunah a nih avangin hel te tih a nih a rin loh thu a sawi a ni.

Hetihlai hian ULFA (Independent)-te chuan an tih a nih thu sawiin Assam-a National Register of Citizens (NRC) update duh lohna lantirna a nih thu an sawi.

United Liberation Front of Assam (Independent) mi Paresh Baruah chuan tualchhung TV channel-ah bomb puak chu an pawl tihpuah a nih thu sawiin Citizenship (Amendment) Bill leh NRC update kalpui mek an dodalna a nih thu a sawi a ni.

Assam Director General of Police (DGP) Kuladhar Saikia chuan hunpui a hnaih avangin venhimna pawh khauh taka an kalpui tih sawiin bomb puak pawh chu an chhuizui dawn thu a sawi.