Assam-a autonomous council din a nih theihnan Meghalaya CM hmu
Garo group Achik Socialist Youth Front Of India (ASYFI) chuan Assam-a Garo Autonomous Council din a nih theihna turin Meghalaya Chief Minister Conrad Sangma an hmu.
Pathianni-a report in a tarlan dan chuan ASYFI hruaitute hian Zirtawpni khan Meghalaya CM Conrad Sangma hi Tura-a a chenna hmunah an hmu a, Conrad Sangma chuan Assam-a Garo unaute chu a theih ang tawka ṭanpui a intiam nia tarlan a ni.
Conrad Sangma chuan Garo Autonomous Council chu a tan pawh thil pawimawh tak a nih thu a sawi.
Sangma chuan GAC chungchang chu Broadcasting Minister of India (New Delhi) hnena hriattir a intiam a, All India Radio leh Doordarshan chu Assam-a Garo program Assam-a Garo te ngaihthlak theih tura siam a nih theih nana hma la turin a ngen dawn tih a sawi bawk.
Garo group-te chuan Assam-a Garo-ten harsatna an tawh chu mipuiten hria se an duh thu sawiin 2013 aṭang tawh khan Garo Autonomus Council din chu an ngiat tawh tih an sawi. Mahse Garo group te chuan Congress sorkar khan an tihhlawhtlin sak thei lo tih an sawi a, Assam-a Garo-te hmasawnna tur chu sorkar chuan a ngaihthah hle tih an sawi bawk a ni.
Garo-te chuan Assam-a BJP sorkar pawh chuan an thil ngiat chu an ngaihpawimawh sak chuang lo tih an sawi a, hemi a nih avang hian Assam-a Goalpara leh Kamrup district-a Garo-te chuan September thla khan darkar 12 bandh an lo huaihawt tawh nghe nghe a ni.