Tripura sorkar in 7th Pay Commission chungchangah thu dik lo thehdarh: CPI(M)
BJP kaihhruai Tripura sorkar chu 7th Pay Commission chungchanga thu dik lo sawiah eptu party Communist Party of India-Marxist (CPI-M) chuan Pathianni khan an puh.
CPI-M sorkar laia Finance Minister ṭhin Bhanulal Saha chuan Agartala-a reporter ten an kawmnaah state sorkar in 7th CPC chungchang a sawi chu thudik lo leh thu belhchian dawl lo a nih thu sawiin sorkar chuan dawt thu a thehdarh mai mai niin a sawi.Thawnthu phuahchawp mai mai a ni tih sawiin central pay scale nen pawh a inzul lo niin a sawi bawk.
Prime Minister Narendra Modi, BJP president Amit Shah leh Tripura CM Biplab Kumar Deb chu bei zuiin pensioner-te leh state sorkar hnathawkte hnenah 7th CPC tiam chu thu dik lo a ni tih sawiin sorkar laipui thuchhuah nen a inmil lo niin a sawi a, heng thu dik lo hi Modi, Shah leh Deb ten an phuahchawp a ni, a ti. Sorkar chuan inthlan laia an hmathlir an sawi te pawh an la thawk zo lo niin a sawi bawk a ni.
Tripura BJP thupuangtu Subrata Chakraborty chuan Saha-an a puhna hi chhanglet in an hnathawk te chu 14% in an hlawh a pun dawn thu sawiin 7th CPC-ah chuan hlawh chu a pung a ṭha hle tih a sawi. Kum 25 chhung mipuite leh an hnathawkte bumna lama hnuhma hnutchhiah tawh tu chuan sorkar hmalakna ṭha tak sawisel turin dikna an nei lo, a ti ve thung.