Arunachal Pradesh Chinese sipai te India ram chinah lut

Chinese Peoples’ Libe­ration Army (PLA) sipai te chuan Arunachal Pradesh-a Line of Actual Control (LAC) kanin India ram chinah tun thla tir khan an lo lut niin defence thupuangtute chuan an sawi.

Report chuan Chinese sipai te hi Arunachal Pradesh chhunga Dibang Valley-ah metre 1000 vel an lut tih a tarlang. Heng China sipaite hi India sipai ten India ram chinah an awm tih an hrilh hnuah an let ve leh mai nia tarlan a ni bawk.

Hetiang hi ni mah se social media lamah chuan an thlakak hi a darh nasa hle a, Arunachal Pradesh tualchhung mite nen inngeih taka thla an la lai te leh lung­rual taka an titi lai thlalak te hmuh tur a awm a ni.

Thudawnna ṭhenkhat bakah ANI chuan he thil hi ni 10 liamta vela thleng tawh kha a nih thu an sawi a, tunah chuan ram pahnih sipaite inkarah pawh hian inrikrapna engmah a awm tawh lo nia sawi a ni bawk.

Congress Lok Sabha member Ninong Ering chuan Thawhṭanni khan Prime Minister Narendra Modi chu China sipai ten India ram chin an lo luh chungchang hi ngaihtuah turin a ti.

Upper Dibang-a PLA sipai lutte hi mi 11 an nih thu tarlan a ni a, tualchhung mi thla an lakpuite hi ramvaka chhuak te an nih tur tarlan a ni bawk.

Ering chuan tunhnaiah Chinese sipai te chuan India ram chin a bik takin Arunachal Pradesh-ah luh an tum fo thu a sawi a, kawngpui rawn siam te pawh an tum niin a sawi bawk. Hemi chungchang hi PM Modi hnenah hian lehkha thawnin India ram inpumkhatna tur atana hma la turin a ngen a ni.

Nikum June 16 aṭanga August thla thleng khan China sipai te leh India sipai te hi Sikkim-a Doklam-ah an lo inep tawh a, Chinese sipai te hian India ram chinah hian kawngpui an siam avangin ram pahnih hi an inep a ni. Hemi avang hian ram pahnih hruaitute hi vawi eng emaw zat an lo inbe tawh nghe nghe a ni.