Manipur University: NHRC in Sept. 20-a thil thleng report phut

National Human Right Commi­ssion (NHRC) chuan Mani­pur sorkar hnenah Septem­ber 20 zanlaia Manipur University (MU) beih a nih dan report thehlut turin a hriattir.

NHRC chuan report kimchang hi kar li chhunga thehlut hman turin a hriattir a, Commission chuan Protection of Human Rights Act, 1993, Section 13 hnuaiah an laka thubuai ziahluhah a vau zui bawk a, report hi thehluh a nih loh chuan Section 13 hnuaiah hian thubuai thehluhah a vau a ni.

NHRC hian Tamil Nadu human rights activist Henri Tip­ha­gne-an complaint a thehluh bawhzuiin hriattirna hi a tichhuak.

September 20 zanlai khan Manipur police-te chu MU campus chhungah hian lut thutin zirtirtu leh zirlai 90 an man a, hemi zan hian zirlaite nen nasa takin an innek buai vangin police-te hian tear gas an hman bakah mock bomb te pawh an hmang a ni. Hemi avang hian mi 10 vel chuan hliam an tuar nghe nghe.

MU-a vice-chancellor pawh lo ni zuai tawh Prof. K Yugindro-an FIR a thehluh avangin Manipur police-te hian University hi an luhchilh a, zirlaite leh zirtirtu ṭhenkhat te hian a hna a zawm dawn hian an lo dang nia sawiin FIR hi a thehlut a ni.

K Yugindro-a FIR theluh vang hian zirlai leh zirtirtu 15 chu jail-ah dah an ni a, an lakah han mi rukbo tum leh tualthah tum thubuai an ziak lut a ni.

Hetiang hi ni mah se October 11 khan Manipur High Court chuan K Yugindro hi a suspend zui ve leh bawk a, Manipur chief secretary hlui Jarnail Singh chu VC atan a ruat lailawk. VC atana ruat hmasak Yugindro hian MU buaina hi a chinfel theih loh avangin court hi an inrawlh nia sawi a ni bawk.

Yugindro hi a lungawi lo hle a, Supreme Court hnenah High Court khinna tur special leave petition a thehlut zui a ni.

Hetihlai hian Jarnail Singh VC atana ruat a ni chu MU Community te an lawm hle a, hlim takin a office a luah tur hi Inrinni khan an lo hmuak a, Jarnail Singh pawh hian a theih ang tawka buaina chinfel a tum thu sawiin a office chu buaina chinfel dan tur thurawn petu tur te tan chuan a hawn reng thu a lo sawi tawh bawk.

Manipur University buaina hi a rei tawh hle a, an VC AP Pandey chu dik lo taka a thuneihna hmanga puh a nih avang leh a office-te night club ang maia hmanga puh a nih bakah sum leh pai pawh dik lo taka a hmang nia puhna vangin MU Community-te hian chhuak turin an nawr a, May 30 aṭang khan nawrh an huaihawt a, August thla thleng khan class pawh an kal thei lo a ni.