Dyurga Puja vangin Shillong police-ten venhimna tikhauh

Meghalaya state khawpui Shillong-a East Khasi Hills police-te chuan Durga puja lawna hlawhtling tak neih a nih theih nan leh boruak duhawm loh a chhuah lohna turin venhimna an tihkhauh thu an sawi.

East Khasi Hills SP, Davis N Marak chuan Thawhṭanni khan Puja lawmna tur hmun zawng zawngah chuan police duty an dah vek dawn thu a sawi a, pathian lim venghim tur pawh an dah dawn thu sawiin kut lawm tawpna niah phei chuan uluk lehzuala venhimna an kalpui dawn thu a sawi a ni.

Marak chuan khaw­laia zuirui leh rui chunga lirthei khalh an awm leh awm loh te pawh uluk taka enfiah turin police-te chu a hriattir bawk a, SP chuan Puja committee hrang hrang pawh meeting an neihpui thu a sawi.

Puja lawmna tur atan hian Traffic kaldan pawh hmun ṭhenkhatah chuan a bik taka an siam dan thu sawiin traffic police leh traffic lam buaipui tu awmsa bakah home guard volunteer 100 leh police 100-150 an dah belh thu a sawi bawk a ni.

Marak chuan Sohra leh Mawsynram-ah pawh venhimna an uluk thu sawiin puja lawmna zawng zawngah chuan CCTV an dah thu a sawi.