Tripura-in school compound-ah political programme/rally neih khap

Tripura sorkar chuan state chhunga school compound-ah politics kaihhnawih thil , rally leh programme dang pawh school hour zawh hnuah pawh buatsaih a khap.

School ṭhenkhat headmaster-ten an school-ah political programme neih an phalsak nia complaint an dawn hnuah, state education deparment chuan Inrinni liam ta khan thupek hi a tichhuak a ni. Department chuan school compound-ah politics kaihhnawih inkhawm buatsaih a nih dawn chuan a hmain no objection certificate (NOC) lak ngei ngei a ni tur a ni, a ti.

School department-in thupek a tihchhuahah hian political function/rally neihna tan school bakah, school playground-te hman phal a ni lo tih a tarlang. Holiday emaw, school hour zawh hnuah emaw programme nei turte chuan Director Secondary/Elementary Education emaw, District Education Officer emaw hnenah NOC hi an la vek tur a ni. Thuneitu lam hian an hman dan tur azirin phalna hi an pe chauh thei tih a tarlang.

Tripura sorkar chuan school hour chhung chuan zirna chu ngaih pawimawh ber a ni zel dawn tih sawiin, Covid-19 hri leng chuan hun rei tak zirna a lo tibahlah tawh a, hei vang hian school hour chhung chuan zirna tibuai thei zawng eng thil mah school compound-ah buatsaih a rem lo tih a sawi a ni.