Guwahati-ah footballer-ten khelmual phutin kawng zawh

Assam state khawpui, Guwahati-ah Pathianni khan footballer naupang zawk 500 chuangten khawpui chhunga football khelhna tur, khelmual siamsak tura sorkar phutin kawng an zawh.

Pathiannia kawngzawh hi national leh international level player hluite pawhin an telpui a ni.

All Assam Football Players' Association president, Hem Das chuan, "Guwahati-ah hian football bik khelhna tur football field pakhat pawh sorkarin a siam lo a ni. Hei vang hian caoching pawh kalpui mumal a har a, tournament pawh buatsaih a ni ngai lo," a ti. 'Kan thil phut chu thil ho te a ni. Nehru Stadium hi football khelhna turin hawng leh se la, Judges' Field-ah football khelh min phalsak rawh se," tiin a sawi.

Cricket match organiser-te nena an inhriatthiamna avangin a hma chuan Nehru Stadium leh Judges' Field-ah hian football khelh phal a ni ve ṭhin a, mahse thla hnih dawn chu heng field pahnihah hian football khelh phalsak an ni tawh lo tih Das chuan a sawi a ni.

Assam Football Association (AFA) secretary Hemendranath Brahma pawhin hun rei tak state sorkar hnenah football field siamsak tur hian an nawr tawh a, mahse tun thlengin association chuan an pualin field an la nei ve lo tih a sawi. Cricket ground atan bika Nehru Stadium dah a nih khan, AFA chuan football field tur ngaihtuah sak turin thuneitute an ngen a, anni pawhin lo ngaihtuah zui an tiam a ni, a ti. A hma chuan Nehru Stadium-ah hian football leh cricket, international match thlengin khelh theih ve ve a ni ṭhin a, tunah erawh chuan cricket pual bik atan dah a ni tawh.

All India Football Association website-a tarlan danin, Assam-ah hian registered footballer 2016 an awm a, coach 152 leh coaching course paruk, referee 955 an awm. Approved club 53 awmin, hetih lai hian playground 10 chauh a awm thung a ni.