President-in Assam a tlawh dawn

India president Ram Nath Kovind chu ni thum cham turin February 25-ah Assam-ah a zin dawn a, a cham chhung hian Ahom general Lachit Borphukan kum 400-na lawmna, kum khat awh neih tur chu a hawng nghal ang.

President hian Kaziranga National Park tlawhin, he park humhalhna kawnga hmalakna hrang hrangte pawh a thlirpui nghal dawn tih chief minister Himanta Biswa Sarma chuan a sawi.

CM Sarma chuan President hi zin tura an sawm thu leh, ani pawhin an ngenna hi a lo pawm thu a sawi.

President Kovind hian Borphukan piancham pawmna puala Jorhat-a a hriatrengna siam cheiṭhatna tur lungphum a phum dawn a, piancham lawmna programme hi Guwahati-ah a hawng bawk ang.

February 26-ah Tezpur-a Tezpur University convocatoin ceremony hmanpuiin, hemi ni vek hian Kaziranga a tlawh bawk ang. Kaziranga National Park-ah President hian jeep safari a nei dawn bawk a ni.

Assam sorkar chuan general Lachit Borphukhan piancham lawmna hi programme lian tham tak pali buatsaih a tum. A lawmna ṭum hnihna hi New Delhi-ah neih an tum a, hetah hian prime minister Narendra Modi an sawm dawn tih CM Sarma chuan a sawi. Mumbai leh Ahmebadad-ah buatsaih an tum bawk a, heng hunah hian defence minister Rajnath Singh leh union home minister Amit Shah-te sawm an tum bawk a ni.