Assam: CAA duh loin mi nuai chuang an kalkhawm

Assam-a Dhemaji Kachari Modian-ah Ninga­ni khan mi nuai chuang pungkhawmin Citizenship (Amendment) Act (CAA) duh lohna an lantir.

CAA duh lohna lan­tir zingah hian zirlai nau­pang aṭanga pitar putar thlengin an kim hle a, sorkar duh lohna thute auchhuahpuiin, an tradi­tional music-te pawh an an tiri nasa hle bawk. Dhemaji-a duh lohna lantirna lian tham tak hi  Assam Students Union (AASU), Dhemaji district unit, association of Asom Jatiyatabadi Yuva Chatra Parishad (AJYCP), artist fraternity leh community organisation hrang hrang ṭangkawpte'n  an buatsaih a ni a, mipuite pawhin an thlawp ṭha hle.

He hunah hian  AASU general secretary Lurin­jyoti Gogoi chuan thu sawiin, state sorkar chuan an state harsatna tawh hrang hrang- tuilian, hna tlem leh thildangte chu political issue siamna atan an hman laiin, loneitute chu an thlahthlam si tih a sawi. Chief minister Sarbananda Sonowal leh BJP hruaitu dangte chuan ram leilung fate chu an ngai pawimawh lo hle tih leh  ‘Peace & unity rally’an buatsaih hmangin hnam hrang inkarah buaina an thlen zawk a ni, a ti.

CAA duh lohna chu Congress emaw Left party emaw vanga lantir nia BJP hruaituten an sawi ṭhin chu thu dik lo a ni tih sawiin, anmahni duhthlanna ngei a nih thu a sawi bawk.  AASU vice president Chittaranjan Basumatary pawhin BJP chuan ram leilung fate an ṭhendarh mek tih a sawi ve bawk a, AJYCP general secretary Palash Changmai pawhin Chief Minister leh BJP minister dangte chu na takin a sawisel a ni.