Manipur University Zirtirtu leh zirlai man te chhuah
Manipur University zirlai leh zirtirtu man te chu thla khat zet tan tir an nih hnuah Thawhlehni khan an chhuah.
Imphal West Chief Judicial Magistrate L. Tonsing chuan Thawhṭanni khan zirtirtu paruk leh zirlai pariat man te hi chhuah turin thupek a tichhuak a ni. Hetihlai hian zirlai pakhat, Vice Chancellor car artui hmanga vawmtu nia puh erawh jail-ah a la awm thung.
September 20 zanlaia police ten MU campus an luhchilh khan zirlai 90 leh professor paruk te hi an man a, a tuk lawkah zirlai tam ber chu chhuah leh nghal an ni a, zirtirtu paruk leh zirlai pakua-te erawh chu an hreng zui ta a ni.
Chief Minister N. Biren Singh chuan sorkar chuan MU buaina chu chinfel a tum zel thu a sawi a, inbiakna neih hunah pawh stakeholder zawng zawng chu tel vek turin a sawm bawk a ni.
September 20 hian MU-a vice-chancellor pawh lo ni zuai tawh Prof. K Yugindro-an FIR a thehluh avangin Manipur police-te hian University hi an luhchilh a, mahse Yugindro pawh hi tun thla ni 11 khan suspend a ni ve bawk.
National Human Right Commission (NHRC) chuan Manipur sorkar hnenah September 20 zanlaia Manipur University (MU) beih a nih dan report thehlut turin a hriattir thu Thawhṭanni khan a lo tarlang ve tawh bawk a, an thehlut lo a nih chuan Protection of Human Rights Act, 1993, Section 13 hnuaiah an laka thubuai ziahluhah a vau zui bawk a ni.