Manipur 2022 : MCC bawhchhiat vangin poster 16,086 leh banner 3,215 lak thlak tir

Manipur assembly inthlan neih tur atana campaign neih mekah, model code of conduct (MCC) bawhchhiat avangin Imphal West district-ah poster 16,085, banner 3,215 leh wall writing 1,765-te chu lak thlak tir a nih thu Imphal West nodal officer Pangamban Shantikumar chuan a sawi.

Nodal officer chuan candidate leh an agent, party worker leh mipuite chu MCC kaihhruaina dante ngaih pawimawh a zawm ṭha turin a chah. Inthlan dik leh felfai tak neih a nih theihna turin mipuite chuan mawhphurhna pawimawh tak an nei a ni, a ti.

Election Commission of India (ECI) in MCC bawhchhiatna awmte awlsam zawka an hriat theihna tura VIGIL app kaltlangin MCC hian complaint hrang hrang an dawng thei reng a ni. He app-ah hian mipuite chuan MCC bawhchhiate, an dan bawhchhiat leh an awmna hmun, thlalak leh video-te an thehlut thei a ni.

Assam CM-in NPP vote lo turin ti
Assam chief minister Himanta Biswa Sarma chuan BJP thawhpui, National Poeple's Party (NPP) chu India ramah tumahin an hre lo tih sawiin, Manipur inthlan lo awm turah pawh vote lo turin mipuite a chah. NPP chuan hlutna engmah a nei lo a, an candidate-te lo vote chu thil awmze nei lo niin a sawi.

Hmarchhaka BJP kaihhruai Congress tel loa ṭangrual pawl , North East Democratic Alliance (NEDA)-ah Sarma hi convenor a ni mek a, NEDA-ah NPP pawh hi an tel a, Manipur-ah pawh BJP kaihhruai ṭangrual sorkarah pawh an tel a ni. Mahse tun ṭum inthlan turah hian BJP leh NPP hian a hranin an chuh dawn a ni. BJP hian assembly seat 60-ah candidate a siam vek a, NPP hian seat 38-ah candidate a siam thung.

Hetih lai hian Assam CM hian ZMoriang assembly constituency-a election rally-a thu a sawiah an thawhpui NPP hi na takin a bei a ni. NPP chu centre-ah a sorkar lo a, NPP kaltlanga centre sorkar biak ngai ai chuan, Manipur-a BJP sorkar a din chuan sorkar laipui nen chuan an inthlunzawm nghal mai dawn niin a sawi. Manipur-ah chuan BJP in sorkarna a siam leh dawn a, NPP tan hmun a awm dawn lo tih a sawi bawk.

Congress-in Manipur culture, history, ṭawng a venghim zel dawn : Rahul Gandhi
Congress party hruaitu Rahul Gandhi pawh Thawhṭanni khan Imphal-a election rally hmanpuiin, Congress party chuan Manipur history, culture leh ṭawngte chu a venghim zel dawn tih a sawi a, hei hi BJP leh RSS chuan an ngai pawimawh ve lo a ni, a ti.

Rahul Gandhi chuan Manipur-ah hmeichhiate tan one-third reservation siam, MSME sector tuaithar, buh thara intodelh, irrigation facility tihchangtlun, food park siam leh hmeichhe bazar 'Ima market' tam zawk siamte a tiam bawk.