Manipur University: Zirtirtu leh zirlai chhuah te lo lawm

Court thupek angin Thawh­lehni khan Manipur Uni­versity zirtirtu paruk leh zirlai pariat, September 20 zanlai buaina chhuaka man te chu chhuah an ni. University zirlai te leh zirtirtute bakah midang mi eng emaw zat leh civil organization te chuan Sajiwa Central Jail-ah an lo hmuak.

Chhuah an nih hnua media ten an kawmnaah School of Humanities dean, professor Ch Yasobanta chuan s state force ten university campu an luhchilh chu Manipur zangruh tihtliahna a nih thu a sawi a, mahse an mi man te jail aṭanga chhuah an ni chuan an thil nawrnaah hnehna an chang tih a tilang niin a sawi.

Manipuri department pro­fessor N. Sanatomba pawhin an thawhpuite leh an zirlaite chhuah tura an nawrna tihhlawhtlina a awm chu lawmawm a tih thu sawiin, Manipur sorkar chetdan chu naupang chhia tak a nih thu a sawi a, thudik finfiah hmain FIR lut an pawm mai niin a sawi ve bawk. Yugindro khan thutlukna dik lo a siam nia sawiin man an nih theihna turin an kalphung a tibuai niin a sawi a ni. Hetiang thil hi a thleng leh a nih chuan sorkar an rinna chu a bo dawn niin a sawi bawk.

Manipur University Student Union (MUSU) chief secretary Laishram Robindro chuan September 21 chu Manipur University black day tia hriat a nih reng tawh dawn thu sawiin an thil ngiat pawh boruak a pangngai hma chuan an ngiat chhunzawm zel dawn tih a sawi.

Jail aṭanga chhuak te lo hmuah an nih zawh hnuah hian Lamyanba Shanglen-ah reception program All Manipur Student’s Union, Manipur Students Federation, Democratic Students Alliance of Manipur, Kangleipak Students Association, Student Union of Kangleipak leh Apunba Irei­pakki Maheiroi Sinpanglup-te chuan an buatsaih sak bawk a ni.

MU VC dinhmun chelh zuaitu Yugindro-an FIR a theh­luh vangin Manipur police-te chuan September 20 zanlaiah khan university campus hi an luhchilh a, zirlai 90 leh zirtirtu paruk an man a ni. Mahse a tukah zirlai tam zawk te chu chhuah leh nghal mah se zirtirtu parukte leh zirlai pakua te chu an hreng zui a, mahse heng an mi man te hi Imphal West Chief Judicial Magistrate L. Tonsing chuan Thawhṭanni khan chhuah turin thupek a tichhuak a, Thawhlehni khan chhuah an ni ta a ni.