Cherry blossom festival hmang turin Meghalaya inpeih

November 14 leh 17 inkara hman tur India International Cherry Blossom Festival 2018 hmang turin Meghalaya chu an inpeih tawh hle tih Meghalaya Chief Minister Conrad K. Sangma chuan a sawi.

India International Cherry Blossom Festival 2018 hi kumdang ang bawkin Shillong-ah hman a ni leh dawn a, khawvela Cherry blossom festival hman tur awmchhun a ni nghe nghe.

Chief Minister Conrad K. Sangma chuan Nilaini khan cherry blossom festival chuan hna a siam belh bakah revenue lam pawhin hlawkna an neih phah tih a sawi a, kum kalta pawh khan mi nuai khat aia tamin an chhim tih a sawi. Hei vang hian tualchhung economy chuan 300% zetin hma a sawn tih a sawi.

CM Conrad Sangma chuan cherry blossom festival lai chuan a par senno leh a var chi te khaw­pui chhung kawng­dung­ah hmuh tur a awm leh ṭeuh dawn tih sawiin wards lake pawh a vul leh hle dawn tih a sawi a ni.

CM chuan Japan sor­kar nena inkungkaihna ṭha neih a nih theih nana Institute Of Bioresources & Sustainable develop­ment (IBSD) hmalakna chu lawmawm a tih thu sawiin cherry blossom festival buatsaih pawh chu hemi kawnga hmalakna chi khat a ni ve bawk tih a sawi.

Chief Minister chuan festival chhung hian fashion show, rock concert, beauty pageant leh golf tournament-te pawh buatsaih a ni dawn tih a sawi bawk.