Meghalaya-in Smart City project kalpui ṭan

Meghalaya chuan Smart City project, cheng vaibelchhe 160 hu chu a kalpui ṭan. 

Sorkar laipuiin Smart City Mission hnuaiah khawpui 99 a thlanchhuah zingah Meghalaya khawpui, Shillong hi a tel a ni. Meghalaya urban affairs minister Hamletson Dohling chuan Smart City Mission hnuai­ah state sorkar chuan Lai­tumkrah-ah cheng vaibelchhe 30 sengin market complex a siam thar dawn tih a sawi a, work order pawh tihchhuah thuai a ni ang, a ti. Laitumkrah-a market complex chu a ṭhat tawk loh avangin ṭhiah a ni dawn tih a sawi bawk. 

Polo-ah pawh market com­plex cheng vaibelchhe 80 sengin siam a ni dawn bawk a, tender pawh buatsaih mek a ni tiin Dohling chuan a sawi. Barik junction-ah world class structure siamin, hetah hian parking, park, museum leh dawrte dah a ni dawn bawk a ni. 

Sorkar laipuiin Smart city project-a funding pattern 50:50 a siam tak avangin state sorkar chuan sum lamah harsatna a nei dawn tih a sawi a, mahse an harsatna sutkian nan hian project hi public-private partnership mode hmanga thawh tum a nih bakah, loan te pawh an la dawn tih a sawi.